पुरानो सारीको सप्को
काँधमा हालेर
चाउरिएको ट्यार्लिनको चोलो
तीन ठाँउमा टालेर
मकै र भटमास
पोल्टामा राखेर
उही बाउका छोराछोरिलाई
बिउताँउने म
त्यही लोग्नेकी श्रीमती
उही क्या
म
साने दमाइकी अर्धाङिनी
बाध्यताले लाएकी छु
मखमलको सारी
बाध्यताले बाधेकी छु
खाँडिको पटुका
बिवसताले बाटेको छु
एक चुल्ठी कपाल
मात्र उही मालिकका निम्ती
खुन पसिना बगाइ दिएको छु
दिन भरी बेचिन्छन
मेरा श्रमहरु
पैसा जोहो छैन
आँफै नताती चुल्होमा
आगो बल्दैन
आफुलाई दुई छाक टार्नु
निकै परको कुरा भएको छ
मालिक मेरो
सेवा चाहन्छ
समाज मेरो
बहिष्कार चाहन्छ
लोग्ने जाँड खाएर पिट्छ
छोरा छोरी
मलाई नै लुछिरहन्छन
मैले बगाएको
पसिनाको मुल्यको लागि
मैले बाढि भएर
बग्नै पर्ने भएको छ
यो ब्यवस्थामा
मान्छे भएर बाँच्न
मैले अर्को
संघर्ष गर्नु पर्ने भएको छ
जस्ले लगाइदियो साँध
जातियताको
जस्ले लगाइदियो बिल्ला
अछुतको
उसैको अन्त्यका लागि
मैले फेरी
लड्नै पर्ने भएको छ
